ដោយ លី ម៉េងហួរអត្ថបទចុះផ្សាយកាលពីថ្ងៃទី 03/07/2009 កែប្រែលើកចុងក្រោយកាលពីថ្ងៃទី 03/07/2009 12:44 ម៉ោងសកល
លោកចៅក្រម ប្រាក់ គឹមសាន ប្រធានអង្គបុរេជំនុំជម្រះ បានប្រកាសសាលដីកានៅរសៀលថ្ងៃសុក្រ ទី៣កក្កដានេះ ដោយសម្រេចបន្តឃុំខ្លួនលោក ខៀវ សំផន អតីតប្រមុខរដ្ឋខ្មែរក្រហម។ សេចក្តីប្រកាសនេះ បានធ្វើឡើងនៅចំពោះមុខលោក ខៀវ សំផន និងសហមេធាវីការពារក្តី លោកមេធាវី ស សូវ៉ាន។ ប៉ុន្តែមិនមានវត្តមានរបស់ លោកមេធាវីបារាំង ហ្សាក់ វែរហ្សែស ឡើយ។
លោក ខៀវ សំផន ក្នុងអង្គសវនាការ ថ្ងៃទី ៣ កក្កដា ២០០៩(រូបថត ៖ ម៉េងហួរ)
“គឺជាសេចក្តីបដិសេធលើបណ្តឹងឧទ្ធរណ៍របស់លោក ខៀវ សំផន ប្រឆាំងនឹងដីកាសម្រេចបន្តថេរវេលានៃការឃុំខ្លួនបណ្តោះអាសន្ន និងគឺជាការបដិសេធលើបណ្តឹងឧទ្ធរណ៍សុំដោះលែងលោក ខៀវ សំផន ឲ្យមានសេរីភាព”។ លោកចៅក្រម ប្រាក់ គឹមសាន បានប្រកាសសេចក្តីសម្រេចរួមលើបណ្តឹងឧទ្ធរណ៍ទាំងពីរយ៉ាងដូច្នេះ ព្រមទាំងប្រកាសបិទផ្លូវតវ៉ា។
ផ្អែកតាមសេចក្តីសម្រេចនេះ លោក ខៀវ សំផន ត្រូវស្ថិតក្នុងការឃុំខ្លួនបណ្តោះអាសន្ននៅតុលាការឧក្រិដ្ឋកម្មខ្មែរក្រហម រហូតដល់ថ្ងៃទី១៩ ខែវិច្ឆិកា ឆ្នាំ២០០៩។
មានអាយុ ៧៨ ឆ្នាំ លោក ខៀវ សំផន ដែលបានកាន់តួនាទីជាប្រមុខរដ្ឋនៃរបបកម្ពុជាប្រជាធិបតេយ្យ ខ្មែរក្រហម ត្រូវបានចាប់ឃុំខ្លួនបណ្តោះអាសន្ន កាលពីថ្ងៃទី១៩ ខែវិច្ឆិកា ឆ្នាំ២០០៧។ តុលាការឧក្រិដ្ឋកម្មខ្មែរក្រហម បានចោទប្រកាន់លោក ខៀវ សំផន ពីបទឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម នៅក្នុងសំណុំរឿង០០២ដែលកំពុងស៊ើបអង្កេត។
លោកចៅក្រម ប្រាក់ គឹមសាន បានគូសបញ្ជាក់ពីការសម្រេចបន្តឃុំខ្លួនលោក ខៀវ សំផន ថា ការឃុំខ្លួនបណ្តោះអាសន្ន នៅតែជាវិធានការចាំបាច់ ក្នុងការការពារកុំឲ្យលោក ខៀវ សំផន រត់គេចខ្លួន ក៏ការពារកុំឲ្យមានការបំផ្លាញភស្ថុតាង ការពារសន្តិសុខដល់សាក្សី និងជាពិសេសដើម្បីការពារសុវត្ថិភាពរបស់លោក ខៀវ សំផន។
ព្រឹត្តិការណ៍ ដែលអតីតប្រមុខរដ្ឋខ្មែរក្រហម លោក ខៀវ សំផន ស្ទើរត្រូវបានវាយសម្លាប់ដោយហ្វូងមហាជន នៅទីក្រុងភ្នំពេញ កាលពីឆ្នាំ១៩៩១ ក៏ត្រូវបានចៅក្រម លើកសំអាង ដើម្បីគាំទ្រដល់សេចក្តីសម្រេចបន្តឃុំខ្លួនលោក ខៀវ សំផន។
អំឡុងពេលដែលលោកចៅក្រម ប្រាក់ គឹមសាន បានប្រកាសសេចក្តីសម្រេចយ៉ាងដូច្នេះ លោក ខៀវ សំផន បានអង្គុយក្នុងរង្វង់ក្រចកសេះ។ ពេលខ្លះលោក ខៀវ សំផន ដែលមានទឹកមុខស្រស់ថ្លា បានយកដៃស្តាំ ច្រត់ចង្ការ និងផ្អែកខ្នងទៅនឹងកៅអី ផ្ទៀងផ្ទាត់ស្តាប់លោកចៅក្រម ដោយយកចិត្តទុកដាក់។ ក៏ប៉ុន្តែ លោក ខៀវ សំផន មិនត្រូវបានអនុញ្ញាត ឲ្យថ្លែងអ្វីឡើយ៕
0 comments:
Post a Comment